Nout zistoir : dofé lamour pou nout kréol
Vyin dékouv soubasman Laspérans Véli, son lanrasineman pou la lang kréol épisa son bourzon pou solèy domin. Nou viv pou fé kado nout lang bann zénérasion i lèv.
Nout lamour pou kréol
Nout pasion pou nout lang la énèt dann zané lisé, lèrk nou té fé lopsion kréol. Kisoi son litératur, son manièr ékri, son kozé, son kozman, son fonnkèr... Kréol la kapay anou dann piédkèr épisa la amar nout pié dann son lantouraz. Sak nou vé sé fé pas kréol konm in patrimoine i viv, i fo okupé épisa i fo fé kado bann marmay domin. Kréol la rant dann lantouraz lékol, lé gayar, sofkoman pou nou li ansèrv pa tout son kapab. Lé lèr mèt fanal desu in lang i mérit pétanflèr an rèn maron dann lantouraz langaz desu la tèr.
Mèt anlèr in pédagoji kréol éspésial
Kan nou la pas nout master MEEF-PIF Créole, nou la travay desu "contextualisation de l'enseignement" pou ansèrv kréol konm in "discipline plurielle". Laspérans Véli i vé trouv solusion pou fagot supor i ékzis pa pou bann marmay i fé kréol dann lékol. Pou linstan nou fokus desu marmay matèrnèl, primèr, sofkoman nou travay pou agrandi nout bèrtèl. Nou vé tir in zépine dann pié bann lamontrèr, sak na poin le tan ou sansa i sobat pou fagot supor, kour ou sansa zaktivité desu kréol. Na tash manièr done azot dé-troi zouti pou tir galé dann zot tant.
Nout lorizon
Ansanm Laspérans Véli, nou pran le tan akout azot pou fagot sak i sèrv azot. Nou vann pa sèlman pou vann, nou vé done sak na poin, in méyèr manièr fé in lamontraz kréol. Nou fé in gatiraz ansanm lamontrèr, ansanm sak i rant dann nout lantouraz. Nou vé fé viv nout lang kréol, nou vé pa tak ali dann bann supor ou sansa bann manièr gardé i kol pa ansanm tout domoun. In lang i apèl in lang akoz son pétanflèr, son lévolusion... Laspérans Véli i tash manièr grandi mèm tan la lang i grandi.
"Laspérans Véli lé pa sèlman in bazar, sé in langazman pou la kiltir èk la mémoir nout lang kréol. "
In lamontrèr, in lartis, in fonnkézèr i yèm son langkozé